Hache meurtrière / poleaxe

F°162r°

Die stend In

der Mordaxt

 

F°162v°, nihil

 

F°163r°

Das register so yber die

.16. stennd der Mordagst gehört volg hernach.

A

Abnemen In der Mordagst gögen

ainem mordschlag .1.

Absetzen In der Mordagst 16

B

 

 

Brustleger gögen ainem ab 10

nehmen

Bruststich gögen ainem Mitelhaw 12

E

 

Ein brechen In der Mordagst 3

Ein winden gögen ainem reisse_ 4

Ein prechen In der Mordagst. 7

Ein winden mit Iren hindern 11

ortern.

G

 

Gemechstich gögen ainem

einwinden 5

Geschrenckts abnemen gögen

ainem gemechtstich 14

M

 

Mordschlag gögen ainem prust 2

stich

Mordschlag gögen ainem 8

Reissen

Mordschlag gögen ainem ge

schrencke_ ansetze_ 15

O

 

Oberhaw gögen ainem stich 9

Oberhaw gögen ainem haw

zu den schencklen 1.3

R

 

Reissen darausz ain wurff geet 6

F°163v°, nihil

 

F°164r°, pl.1

Ein abnemen In der Mordagst gögen ainem Mordschlag

Item schickh dich also In Dises stuckh wann Ir zusamen gond stannd mit deinem rechten fuosz vor. vnnd halt dein Mordagst Inn baiden henden ob deinem haupt In der hoch. den ort gestrackh gogen dem man. stat er dann mit seinem lincken fuosz gögen dir vnd schlecht. dir ainen Mordschlag nach deinnem haupt. so nimb Im das ab mit deiner Mordtagst. auf dein lincke seiten Indes zuckh dein Mordtagst an dich vnnd stich Im zu seinen gemechten Sticht er dir also vnden zu. so nimb Im das ab mit deinem hindern Ort deiner Mordagst. Inndem volg mit deinem rechten schenckel hinnach vnd haw Im mit deinem plat deiner Mordagst nach seinem gesicht. versetzt er dir das zwischen baiden henden In sein gehultz. so wind Im deinen hindern Ort zwischen seinen baiden armen hinein zu seinem gesicht. hawt vnnd windt er dir also ein. so trit mit deinem rechten schenckel zu ruckh vnnd nimb Im das ab zwischen baiden henden In dein gehultz. versetzt er dir das also. so haw Im behend widerumb nach seiner obern plosz. hawt er dir also oben zu so nimn Im das ab mit deinem gehultz reisz damit auf dein lincke seiten. vnnd stich Im zu seinem gesicht Inndem trit vnd wind dich damit von Im zu ruckh

F°164f°, pl.2

Ain mordschlag gogen ainem prust stich

 

Item wann Ir zusamen Gond so schickh dich also In dises stuckh mit gleichen fuossen aufrecht. vnnd halt dein Mordagst mit baiden henden Inn dem gehultz. dein lincke hannd In der hoch hinder deinem haupt. Indem trit mit deinem rechten. schennckel hinein vnnd haw Im mit deinem plat von oben nach seinem haupt. haut er also vo_ oben auf dich vnnd du mit deinem lincken fuosz gögen Im steest vnd helst dein Mordagst mit deiner rechten hand hinder deinem haupt. dein lincke bey deinem vordern Ort gögen dem Man. so nimb Im seinen haw mit dem plat deiner Mordagst hinweckh auf dein rechte seiten. Indes stich Im mit deinem vordern Ort zu seiner prust. sticht er dir also zu nimb Im das ab zwischen baiden henden In dem gehultz. auf dein lincken seiten Inndem wind Im deinen vordern Ort deiner Mordagst vber seinen lincken arm. zu seiner prust. vnnd reisz starckh zu dir. trit vnnd wind dich damit von Im zuruckh

F°165r°, pl.3

Zway einprechen Inn der Mordagst

 

Item halt dich also Mit disem stuckh wann Ir zusamen gond stannd mit deinem linckhen fuosz vor vnnd halt dein Mordagst Inn baiden henden dein lincken vornen bey deinem plat. dein rechte bey deinem hindern Ort. Inndem prich Im ein mit deinnem vordern Ort vnd stich Im vber seinen lincken arm zu seinem hals. sticht er dir also zu vnnd du mit deinem rechten fuosz gögen Im steest. so nimb Im das ab mit deinem plat auf dein lincke seiten Indem volg mit deinem lincken schennckel hinnach vnnd setz Im mit deinem plat deiner Mordagst. hinder seinen hals seiner rechten seiten. zeuch Inn damit zu dir Ist er dir also einprochen vnnd zeucht dich a zu Im so nimb Im das ab mit deinem plat deinner Mordagst auf dein rechte seiten Indes stich Im deinen vordern Ort zu. seinen gesicht vnnd trit mit deinem linckhen schenckel zuruckh. sticht er dir also zu so volg mit deinem rechten schennckel hinnach vnd nimb Im das ab mit deinem hindern Ort. auf dein lincke seiten Indes Doplier vnnd schlag Im ainen Mordschlag nach seinem haupt trit vnnd wind dich damit von Im zu ruckh

F°165v°, pl.4

Ainn Einwinden gögen ainem reyssen

 

Item wann Ir zusamen Gond so halt dich also mit disem stuckh. stannd mit deinem rechten fuosz vor vnnd hallt dein Mordagst In guter versatzung gögen dem Man Indes volg mit deinem lincken schennckel hinnach vnnd schlag Im ainen Mordschlag nach seinem haupt. Schlecht er dir also oben zu vnnd du dein Mordagst Inn baiden henden hast dein rechte vornen. dein lincke bey deinem hindern Ort den rechte schennckel furgesetzt. so nimb Im das ab mit deinem gehultz auf dein lincke seiten. Inndem volg mit deinem lincken schenckel hinnach. vnnd wind Im deinen hindern Ort vber seine baid Arm. verwechsel damit dein lincke hand zu deinem hindern Ort. vnnd zeuch Im oben sein rechte hannd mit dem plat vnd vnnden sein lincke hannd mit deinem lincken Arm zu dir. zeucht Er dich also zu Im auf sein rechte seiten. so lasz dein rechte hand gon von deiner Mordagst. setz Im damit an sein lincke Achsel vnd scheub In von dir scheubt er dich also von Im. so trit mit deinem lincken schenckel zu ruckh vnnd wind Im deinen vordern Ort mit ainem stich zu seiner prust. trit damit von Im zu ruckh In guter versatzung .

F°166r°, pl.5

Einn Gmechtstich gögen ainem einwinden

 

Item schickh dich also Inn dises stuckh wann Ir zusamen gond. stand mit deinem lincken fuosz vor. vnnd hallt dein Mordagst In der höch vor deinem gesicht. dein rechte mitten Inn deinem gehultz. dein lincken bey deinem hindern Ort. Inndem trit mit deinem rechten schenckel hinein vnnd stich Im deinen vordern Ort zu seinen gemechten. sticht er dir also zu vnnd du mit deinem rechten fuosz gögen In steest. vnnd helst dein Mordagst Inn baiden hennden vor deinem gesicht dein rechte vnden bey deinem hindern ort. dein lincke oben bey deinem vordern. so nimb Im das ab mit deinem hindern Ort auf dein lincke seiten. Indes haw Im mit deinem plat nach seinem haupt. versetzt er dir das zwischen hennden Inn sein gehultz. so volg mit deinem lincken schennckel hinnach vnd wind Im deinen hindern Ort. mit ainem stich zwischen seinen baiden. Armen zu seinem gesicht. versetzt Er dir das furbas. so trit mit deinnem lincken schennckel zu ruckh. vnnd haw Im mit deinem plat nach seinem rechten Arm wind dich damit von Im zu ruckh

F°186v°, pl.6

Zway reyssen darausz ain Wurff geet

 

Item wann Ir zusamen Gond so schickh dich also Inn dises stuckh stannd mit deinem rechten fuosz vor vnnd halt dein Mordagst In der hoch vor deinem gesicht auf deiner lincken seiten dein rechte hannd vornen bey deinem hindern Ort. dein lincke. mitten Inn deinem gehultz. Inndem volg mit deinem linckhen schennckel hinnach vnnd haw Im mit deinem plat nach seinem haupt. Nimpt er dir das ab zwischen baiden henden Inn sein gehultz so wind Im deinen vordern Ort vnnd plat vnnder sein rechte kniepug. zeuch damit zu dir. hat er dir also vnnden angesetzt vnnd zeucht dich zu Im. so gee Im auch mit deinem plat deiner Mordagst mit ainem haw vmb seinen hals seiner rechten seiten. Reisz damit starckh zu dir. so mag dir sein ansetzen ain schennckel nit schaden Reist er dich also oben zu Im. so trit Inn Drianngel vnnd nimb Im das abzwischen baiden hennden Inn dein gehultz truckh damit starckh ybersich so nimbstu Im oben dz gewicht. Inn dem lasz dein lincke hannd von deiner Mordagst. ergreiff damit seinen rechten schennckel vnnd heb In vbersich. so wirfstu In zu ruckh

F°187r°, pl.7

Ein einprechen In der Mordagst

 

Item halt dich also mit Disem stuckh. wann Ir zusamen gond stannd mit gleichen fuossen aufrecht vnnd halt dein Mordagst Inn baiden henden Inn der hoch vor deinnem gesicht Inndem volg mit deinem lincken schennckel hinnach vnnd haw Im mit deinem plat nach seinem haupt. hawt er dir also oben zu. so haw seinem haw entgögen. Nim Im das damit hinweckh. Inn dem prich Im ein mit deinem vndern Ort. vber seinen rechten Arm vnnd erwisch Im mit deiner rechten hannd sein Mordagst zu sampt der deinnen wend dich damit auf dein rechten seiten. so truckhstu Im sein rechte hannd zwischen baiden Mordagsten. Ist er dir also eingeprochen vnnd begert dir dein Mordagst zunemen. so lasz Im die Inndem greiff Im mit deinner lincken hand ausswendig vnder sein rechte Vchsen. truckh In damit starckh von dir vnnd mit deiner rechten greiff widervmb In dein Mordagst. Indes reisz die ausz seiner hannd trit damit zu ruckh vnnd haw Im ainen Mordschraich mit deinem plat nach Seinem haupt

F°167v°, pl.8

Ain mordschlag gögen ainem reyssen

 

Item wann Ir zusamen Gond so hallt dich also Inn disem stuckh stannd mit deinem rechten fuosz vor vnnd halt dein Mordagst mit baiden henden Inn deinem gehultz Inndem schlag Im ainen Mordschlag mit deinem plat nach seinem haupt. hawt er dir also oben zu vnnd du mit deinem lincken fuosz gögen Im steest. so gee Im mit deinem vordern Ort zwischen seinen baiden armen hinnein. setz Im damit an seinen hals seiner rechten seiten vnnd nimb Im seinen straich mit deinem hindern Ort hinweckh. Indes Reisz In mit deinem hacken deines plats zu dir. reister dich also zu Im. so verwechsel dein rechte hand von Innwendig auszwendig widerumb In dein Mordagst wind damit sein Mordagst vndersich vnnd schneid Im mit deinem Plat nach seinem hals seiner lincken seiten. hat er dir also angesetzt. so nimb Im das ab mit deiner Mordagst auf dein rechte seiten Indem stich Im mit deinem vordern Ort zu seinem gesicht trit vnnd wind dich damit von Im zuruckh

F°168r°, pl.9

Ein oberhaw gögen ainem stich

 

Item schickh dich also In Dises stuckh. wann Ir zusamen gond stand mit deinem lincken fuosz vor vnnd halt dein Mordagst In baiden henden Inn der hoch vor deinem gesicht Inn dem volg mit deinnem rechten schennckel hinnach vnnd haw Im mit deinem plat nach seinem haupt. hawt er dir also oben zu. vnnd du mit deinem lincken fuosz gögen Im steest. vnnd helst dein Mordagst mit deiner lincken hand bey deinem vordern Ort gögen dem Man dein rechte bey deinem hindern. so nimb Im seinen haw zwischen baiden henden Inn deinem gehultz hinweckh Inndem stich Im mit deinem vordern Ort zu seinem hals. sticht er dir also zu so setz Im das ab. auf dein rechte seiten Indem stich Im mit deinem vordern Orth yber seinen lincken Arm zu seinem gesicht. versetzt er dir das mit seiner Mordagst. so wind Im deinen hindern Ort nach seiner lincken seiten. windt er dir also vnden ein. so setz Im das ab mit deinem plat Indem Inndem volg mit deinem rechten schenckel hinnach vnd stich Im deinen vordern Ort zwischen seinen baiden armen zu seiner prust trit vnnd wind dich damit von Im zuruckh

F°168v°, pl.10

Ainn prustleger gögen ainem abnemen

 

Item wann Ir zusamen Gond so schickh dich also Inn dises stuckh. stannd mit deinem lincken fuosz vor. vnnd halt dein Mordagst Inn baiden henden. dein lincke bey deinem vordern Ort gögen dem man dein rechte vnnden bey deinem hindern Ort. ob deinner prust. Inn dem volg mit deinem rechten schenncke hinach. vnd wind Im mit ainem windthaw von deiner prust zu seinem haupt. hawt Er dir also oben zu. vnnd du mit deinem rechten fuosz gögen Im steest. vnnd helst dein Mordagst mit deiner rechten hand bey deinem hindern Ort. gögen dem Mann.dein lincken bey deynem vordern auf deiner lincken seiten. so trit mit deinem rechten schennckel zu ruckh vnnd versetzt Im den haw zwischen baiden henden Inn dein gehultz. Indem trit mit deinem rechten schenckel wider hinein vnd wind Im deinen hindern Ort zu seinem gesicht. versetzt er dir das zwischen baiden henden In sein Mordagst. so volg mit deinem lincken schenckel hinach vnnd haw Im ainen Mordstraich mit deinem plat nach seinem haupt trit vnnd wind dich damit von Im zuruckh

F°169r°, pl.11

Zway einwinden mit Iren hindern Ortern

 

Item hallt dich also mit Disem stuckh wann Ir zusamen gond stannd mit deinem rechten fuosz vor. vnnd hallt dein Mordagst Inn baiden henden dein rechte bey deinem hindern Ort gogen dem Man dein lincke hinden bey deinem plat. Indem volg mit deinem lincken schenckel hinach vnnd wind Im deinen hindern Ort zwischen baiden armen hinein zu seinem hals. Windt er dir also ein vnnd du mit gleichen fuossen aufrecht gögen Im steest vnnd helst dein Mordagst mit baiden henden mitten Inn deinem gehultz Inn der hoch vor deinnem gesicht. so nimb Im. das ab mit deinem hindern Ort auf dein rechte seiten Indem volg mit deinem linckhen schenckel hinnach vnnd wind Im deinen hindern ort zwischen baiden Armen hinein zu seinem gesicht. Versetzt er dir das so haw Im behend ainen Mordstraich mit deinem plat nach seinem haupt. Haut er dir also oben. zu so trit mit deinem lincken schennckel zu ruckh. vnd versetz Im das zwischen baiden henden Inn dein gehultz Inn dem reiss Im mit deinem Plat sein Mordagst vnndersich. vnd stich Im mit deinem vordern Ort. zu seinem gesicht. trit vnnd wind dich damit von Im zuruckh

F°169v°, pl.12

Ainnprust stich gogen ainem Mittelhaw

 

Item wann Ir zusamen Gond so halt dich also mit disem stuckh. stannd mit deinem lincken fuosz vor. vnnd halt dein Mordagst mit deiner lincken hand bey deinem plat gögen dem Man. dein rechte bey deinem hindern Ort. hinder deinem haupt In dem volg mit deinem rechten schennckel hinnach. vnnd stich Im mit deinem vordern ort. zu seiner Prust. Sticht er also vo_ oben auf dich vnnd du mit deinem rechten fuosz gögen Im steest. vnnd helst dein Mordagst In baiden henden auf deiner lincken seiten. so gee mit deinem hindern Ort auf. vnnd nimb Im seinen stich hinweckh auf dein lincke seiten. Inndem volg mit deinem lincken schennckel hinnach vnd haw Im ainen Mittelhaw nach seiner rechten seiten mit deinem plat. hawt er dir also nach deiner rechten seiten. so nimb Im das ab mit deinnem gehultz deiner Mordagst Indes reisz mit deinem plat sein Mordagst auf dein lincke seiten vndersich vnd stich Im nach seiner prust. Versetzt er dir das zwischen beiden henden In das gehultz. so haw Im behend mit deinem plat nach seinem haupt. vnnd trit damit von Im zu ruckh

F°170r°, pl.13

Ein abnemen gogen ainem haw zu dem Schennckel

Item schickh dich also Inn Dises stuckh. wann Ir zusamen gond stand mit gleichen fuossen aufrecht vnnd hallt dein Mordagst In baiden henden In der hoch ob deinem haupt. In dem trit mit deinem lincken schennckel hinein vnnd haw Im von oben nider mit deinem plat nach seinem furgesetzten schennckel. Stastu dann also mit deinem lincken fuosz gögen Im vnnd er dir darnach schlecht. so far mit deiner Mordagst vnndersich. vnnd setz dir fur deinen lincken schennckel. deinen vordern Ort auf die erden. nimb Im damit seinen straich ab. Inndem gee auf mit deiner Mordagst vnnd volg mit deinem rechten schenckel hinnach. stich Im damit deinen vordern Ort. zu seinem hals. nimpt er dir das ab mit seinem plat auf sein rechte seiten. so wechsel Indes behend vnnden durch. vnnd stich Im hach seiner. lincken seiten. Sticht er dir also zu. so nimb Im das ab mit deinem plat auf dein lincken seiten Indem volg mit deinem rechten schenckel hinnach vnd wind Im deinen hindern vnnd vordern Ort. zwischen baiden armen hinein zu seinem gesicht oder der prust Indes haw Im mit deinem plat nach seinem haupt vnd trit damit. von Im zu ruckh

F°170v°, pl.14

Ain gschrenckts abnemen gogen ainem gemechtstich

Item wann Ir zusamen gond So schickh dich also. Inn dises stuckh. stannd mit deinem rechten fuosz vor. vnnd halt dein Mordagst In baiden henden on deinem haupt. dein rechte bey deinem vordern Ort gögen dem Man. die linck bey deinem hindern. Indem volg mit deinem linckhen schennckel hinach vnnd stich Im mit deinem vordern Ort zu seinen gemechten. Sticht er dir also zu deinen gemechten. vnnd du mit deinem lincken fuosz gögen Im steest. vnd helst dein Mordagst mit geschrennckten Armen gögen dem Man. dein lincke hand bey deinem plat. dir recht vornen Inn dem gehultz. so trit mit deinem linckhen schennckel zu ruckh. vnd nimb Im seinen stich mit deinnem hindern Ort hinweckh auf dein lincke seiten. Indes trit behend mit deinem lincken schenckel wider hinein vnnd wind Im deinem vordern Ort. von vnnden auf zu seinem gesicht oder der prust. windt er dir also ein. so nimb Im das ab zwischen baiden henden In dein gehultz. In dem trit In triangel vnnd haw Im mit deinem plat nach seinem haupt. zeuch dich damit von Im zu ruckh

F°171r°, pl.15

Ein mordthaw gögen ainem geschrenckten Ansetzen.

Item halt dich also mit Disem stuckh / wann Ir zusamen gond. stannd mit deinem lincken fuosz vor. vnnd hallt dein Mordagst mit geschrennckten armen gögen dem Man. Inn dem setz Im mit deinem vordern Ort an seinen lincken arm mit ainem stich. Stastu dann auch also mit deinem lincken fuosz gögen Im. vnnd er dir nach deinem lincken arm sticht. so trit mit deinem lincken schenckel zuruckh vnnd nimb Im das ab mit deinem palt auf dein lincken seitten. Indes trit behend wider hinein vnnd haw Im ainen Mordhaw mit deinem plat nach seinem haupt. hawt er dir also oben zu. so nimb Im das abzwischen baiden henden In dein gehultz Inndem volg mit deinem rechten schennckel hinnach vnd wind Im deinen vordern ort. mit ainem stich zu seinem gesicht. oder der prust versetzt Er dir das. so trit mit deinem rechten schennckel wider zu ruckh vnd haw Im ainen windt haw nach seinem lincken furgesetzten schenckel. trit damit von Im zu Ruckh

F°171v°, pl.16

Zway ansetzen Inn der Mordagst

 

Item wann Ir zusamen gond So halt dich also mit disem stuckh stannd mit deinem rechten fuosz vor. vnnd halt dein Mordagst Inn baiden henden bey deinem hindern Ort. Inn der hoch ob deinem haupt. Inn dem volg mit deinem linckhen schennckel hinnach vnd haw Im ainen zwirschhaw nach seinner rechten seiten seines haupts. hawt er dir also obenzu vnnd du mit deinem lincken fuosz gögen Im steest. wol Inn der wag. dein Mordagst Inn baiden henden dein vordern Ort gögen der erden so gee. auf mit deiner Mordagst vnnd nimb Im seinen zwirchhaw zwischen baiden henden Inn dein gehultz hinweckh. hat er dir also abgenomen so setz Im mit deinem vordern Ort deiner Mordagst mit ainem stich anseinen lincken arm. hat er dir also angesetzt so nimb Im das ab mit deinem plat. Indes sperz Im sein Mordagst mit deinem plat vnnd stich Im deinen vordern Ort mit ainem nachtruckh mit sterckh In seinen leib so stichtstu In zu der erden.

%d blogueurs aiment cette page :